ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᓈᒻᒪᓴᖅᑐᑦ 2022-ᒥ ᑮᓇᐅᔭᓂᑦ
ᐊᑐᖅᑐᑦᓴᓕᐊᖑᑎᓯᒪᔪᓂᑦ
ᕕᕝᕗᐊᕆ 17, 2022- ᐃᖃᓗᐃᑦ, ᓄᓇᕗᑦ
ᓇᒡᒋᔾᔭᐅᓕᖅᑭᕐᒥ, ᕕᕝᕗᐊᕆ 15, ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᓈᒻᒪᑦᓴᓚᐅᖅᑐᑦ 2022-ᒥ ᑮᓇᐅᔭᒃᑯᑦ ᐊᑐᖅᑐᑦᓴᓕᐊᖑᓯᒪᔪᓂᑦ.
“2022-ᒥ ᑮᓇᐅᔭᒃᑯᑦ ᐊᑐᖅᑐᑦᓴᓕᐊᖑᓯᒪᔪᑦ ᓄᓇᓕᐸᐅᔭᒃᑯᓐᓄᑦ ᑐᕌᒐᖃᕈᓐᓇᕈᑎᐅᓂᐊᖅᑐᑦ ᐱᐅᔪᐊᓗᓐᓂᑦ ᐱᔨᑦᓯᕋᐅᑎᓕᐅᕈᑎᓕᐅᕈᑎᐅᓗᑎᒃ ᐊᒻᒪ ᐱᖁᑎᓂᑦ ᐊᐅᓚᑦᑎᔾᔪᑎᐅᓗᑎᒃ, ᐊᒻᒪᑦᑕᐅᖅ ᓴᓇᔭᐅᔪᓐᓇᕐᓯᓗᑎᒃ ᐊᑑᑎᖃᕐᓂᖏᑦ ᒪᑭᒪᑎᑦᓯᔾᔪᑎᑦᓴᓂᑦ ᐱᓕᕆᔾᔪᑎᒍᑦ ᐱᓕᕆᐊᑦᓴᓕᐅᕈᑎᐅᓗᑎᒃ. ᐃᖅᑲᓇᐃᔭᖅᑎᖁᑎᕗᑦ ᐅᐸᓗᖓᐃᔭᕆᐊᖃᕋᑦᑎᒍ ᓯᕗᓂᑦᑎᓐᓂ ᐊᑦᓱᕉᑎᐅᕙᓐᓂᐊᖅᑐᓂᑦ. ᐊᓯᔾᔨᐅᑎᐅᔪᑦ ᐊᒻᒪ ᖁᕝᕙᒋᐊᕈᑎᐅᔪᑦ ᐊᑭᓕᕐᓱᐃᔾᔪᑎᓂᑦ ᐱᖃᓯᐅᔾᔭᐅᓯᒪᔪᑦ 2022-ᒥ ᑮᓇᐅᔭᒃᑯᑦ ᐊᑐᖅᑐᑦᓴᓕᐊᖑᓯᒪᔪᓂ ᓇᓗᓇᐃᕐᓯᒪᒍᒪᓪᓗᑎᒃ ᐊᑭᓕᕐᓱᐃᔾᔪᑎᒍᑦ ᑕᐃᒫᓪᓗᐊᖅ ᐊᑭᓕᕐᓱᐃᔾᔪᑎᐅᕙᓪᓗᑎᒃ ᐅᕝᕙᓘᓐᓃᑦ ᖄᓃᓯᒪᓪᓗᑎᒃ ᓂᐅᕐᕈᑎᓕᕆᓂᒃᑯᑦ ᐊᑭᓕᕐᓱᐃᔾᔪᑎᓂᑦ ᐊᔾᔨᐸᓗᖏᓐᓂᑦ ᐃᖅᑲᓇᐃᔮᑦᓴᓄᑦ. ᐱᔪᒥᓇᕐᓴᐃᕙᓐᓂᖅ ᐊᒻᒪ ᐱᓯᒪᑦᑎᕙᓐᓂᖅ ᐃᖅᑲᓇᐃᔭᖅᑎᓂᑦ ᖃᐅᔨᒪᑦᑎᐊᖅᑐᓂᑦ ᐱᓕᕆᔪᓐᓇᓯᐊᖅᑐᓂᑦ ᐊᑑᑎᓕᒻᒪᕆᐅᒻᒪᑕ ᐃᑲᔫᑎᐅᓂᐊᖁᓪᓗᒋᑦ ᓄᓇᓕᐸᐅᔭᒃᑯᓐᓂᑦ ᐱᓕᕆᐊᖃᕈᓐᓇᖁᓪᓗᒋᑦ ᐸᕐᓇᒍᑎᒍᑦ ᐸᕐᓇᐅᑎᓕᐅᕈᑎᐅᓯᒪᔪᓂᑦ.”
- ᑲᑎᒪᔨ ᓴᐳᕐᑦ, ᐃᑦᓯᕙᐅᑕᖓᑦ ᑮᓇᐅᔭᓕᕆᓂᕐᒥᑦ ᑲᑎᒪᔨᕋᓛᖏᑕ ᑲᑎᒪᔩᑦ
ᐅᑯᐊ ᑮᓇᐅᔭᒃᑯᑦ ᐊᑐᖅᑐᑦᓴᓕᐊᖑᓯᒪᔪᑦ ᑕᑯᑦᓴᐅᑎᑦᑎᔪᑦ ᓄᓇᓕᐸᐅᔭᒃᑯᑦ ᐱᓕᕆᐊᕆᔪᒪᔭᖏᓐᓂᑦ ᐃᑲᔪᕐᓱᐃᔾᔪᑎᑦᓴᐅᔪᓂᑦ ᓄᓇᓕᐅᑉ ᐃᓄᒋᐊᑦᓯᕙᓪᓕᐊᓂᖓᓂᑦ, ᑭᓯᐊᓂ ᐃᓄᑑᔾᔨᔪᓐᓇᖏᑦᑐᒍᑦ; ᐊᑯᓂᐅᔪᒧᑦ ᑮᓇᐅᔭᐃᔭᐅᑎᐅᒋᐊᓕᓐᓂᑦ ᑭᖕᖒᒪᑦᓯᓂᐊᖅᑐᒍᑦ ᓄᓇᕘᒧᑦ ᐊᒻᒪ ᑲᓇᑕᒧᑦ ᒐᕙᒪᒃᑯᖏᓐᓂᑦ ᑲᑐᔾᔨᖃᑎᑦᓴᓂᑦ ᐱᓕᕆᔾᔪᑎᑦᓴᐅᔪᓐᓇᖅᑐᓂᑦ ᐊᑐᖅᑕᐅᔪᑐᖄᓗᓐᓂᑦ ᒪᑭᒪᑎᑦᓯᔾᔪᑎᑦᓴᓂᑦ ᐱᓕᕆᔾᔪᑎᒍᑦ ᐱᑕᖃᖅᐸᖏᑦᑐᓂᑦ ᖃᓄᐃᓕᐅᕈᑎᒋᓇᓱᐊᕈᓐᓇᖅᑕᑎᓐᓂᑦ. ᑕᑎᒋᔭᕐᓂᑦᑐᓂᑦ ᒪᑭᒪᑎᑦᓯᔾᔪᑎᑦᓴᓂᑦ ᐱᓕᕆᔾᔪᑎᒍᑦ ᐱᑕᖃᕆᐊᖃᕋᓗᐊᕐᒪᑦ ᐱᐅᓯᑎᒋᐊᕈᑎᐅᔪᓐᓇᖅᑐᓂᑦ ᐃᓅᓇᓱᐊᕈᑎᖏᒍᑦ ᓄᓇᓕᕐᒥᐅᑕᐃᑦ ᐊᒻᒪ ᐃᑲᔪᕐᓱᐃᔾᔪᑎᑦᓴᓂᑦ ᑮᓇᐅᔭᓕᕆᔾᔪᑎᒍᑦ ᐱᕈᖅᐸᓪᓕᐊᒍᑎᖏᓐᓂᑦ ᓄᓇᓕᐸᐅᔭᑦᑕ.
- ᒪᐃᔭ ᐱᐅᓪ.
2022-ᒥ ᑮᓇᐅᔭᒃᑯᑦ ᐊᑐᖅᑐᑦᓴᓕᐊᖑᓯᒪᔪᑦ ᐱᓪᓗᐊᑕᖏᓐᓄᑦ ᐅᑯᐊ ᐱᖃᓯᐅᔾᔭᐅᓯᒪᔪᑦ:
- ᒫᓐᓇᐅᔪᖅ ᐊᑐᖅᑕᐅᕙᑦᑐᓄᑦ ᐊᖑᒻᒪᑎᒋᐊᕐᓗᒋᑦ ᐱᓕᕆᔾᔪᑎᐅᔪᑦ ᐱᖃᓯᐅᔾᔭᐅᓗᑎᒃ
ᐱᐅᓯᑎᒋᐊᖅᑕᐅᓗᑎᒃ ᐊᑭᓕᕐᓱᐃᔾᔪᑎᒃᑯᑦ ᓇᓖᕌᕈᑎᑦᓴᐅᔪᓐᓇᖅᑐᑦ ᓄᑖᒥ ᐃᑭᐊᖅᑭᕕᒻᒥ ᐋᖅᑭᑦᑕᐅᓯᒪᔪᑦ.
• ᓴᓇᔭᐅᓗᓂ ᓄᑖᖅ ᐊᐅᓚᑦᑎᕕᑦᓴᖅ ᐱᓕᕆᔾᔪᑎᓂᑦ, ᓱᓇᒃᑯᑖᓂᑦ ᓴᓂᕐᕙᐃᕕᑦᓴᖅ ᐊᒻᒪ ᐃᖅᑲᓇᐃᔭᖅᑎᓄᑦ ᐊᓪᓚᕕᑦᓴᑦ.
• ᐋᖅᑭᑦᑕᐅᓗᑎᒃ ᓄᑖᑦ ᐊᑐᕆᐊᑦ ᑭᓪᓕᖏᓐᓂ ᖃᐅᒪᐃᑦ ᖃᐅᒪᖃᕆᐊᖃᕐᓂᖏᓐᓄᑦ ᓄᓇᓕᓐᓂ, ᐱᐅᓯᑎᒋᐊᖅᑕᐅᓗᑎᒃ ᑭᒃᑯᑐᐃᓐᓇᕐᓂᑦ ᐊᑦᑕᓇᖅᑐᒦᑦᑕᐃᓕᒪᐅᑎᑦᓴᑦ.
• ᓴᓂᕐᕙᑦᑕᐅᓗᑎᒃ $2.9 ᒥᓕᐊᓐ ᐊᑭᑐᔪᓄᑦ ᑮᓇᐅᔭᐃᔭᐅᑎᑦᓴᑦ, ᐱᓕᕆᔾᔪᑎᐅᓗᑎᒃ ᐊᑐᖅᑕᐅᒋᐊᓕᓐᓂᑦ ᐊᑑᑎᖃᕐᓂᖏᓐᓄᑦ ᐃᖅᑲᓇᐃᔮᑦᓴᓄᑦ ᐃᒥᕐᒥᒃ ᓴᓗᒻᒪᕐᓴᐃᕕᒥ, ᐱᔾᔪᑎᐅᓗᓂ 2021-ᒥ ᐃᒥᒃᑯᑦ ᑐᐊᕕᕐᓇᖅᑑᓚᐅᖅᑐᖅ.
• ᑲᔪᓯᔭᐅᓗᓂ ᓂᐊᖁᖕᖒᑎᐅᑉ ᑰᖓᓂᑦ ᒥᓪᓗᐊᑎᑦᑎᓂᐅᕙᑦᑐᖅ ᐃᒥᕐᒥᒃ ᐃᒥᖅᑕᕕᒻᒥᑦ ᐃᒥᖃᖅᑎᑦᓯᔾᔪᑎᐅᕙᑦᑐᒥᑦ ᓄᓇᓕᓐᓂᑦ.
• ᐃᓚᒋᐊᖅᑕᐅᓗᑎᒃ ᐱᓕᕆᔾᔪᑎᐅᔪᑦ ᐊᑑᑎᓕᒻᒪᕆᓐᓄᑦ ᑭᓈᓗᓕᕆᔾᔪᑎᓄᑦ ᓱᓪᓗᓖᑦ.
• ᓴᓇᔾᔪᑎᑦᓴᑦ ᑎᓯᔪᓂᑦ ᓴᓂᓕᕆᕝᕕᑦᓴᒥᑦ ᐊᒻᒪ ᐊᑦᓯᕕᑦᓴᒥᑦ.
• ᖁᕝᕙᒋᐊᖅᑕᐅᓗᑎᒃ ᓴᓂᓕᕆᔾᔪᑎᓄᑦ ᐊᑭᓕᐅᑎᐅᕙᑦᑐᑦ 2%-ᐳᓴᓂᑦ, ᐅᐸᓗᖓᐃᔭᐅᑎᐅᓗᑎᒃ ᒪᑐᓯᔾᔪᑎᑦᓴᓂᑦ ᑰᓕᐊᕆᐊᒥ ᐊᑦᓯᕕᒻᒥᑦ.
• ᖁᕝᕙᒋᐊᖅᑕᐅᓗᑎᒃ ᐃᒥᕐᒧᑦ/ᑭᓈᓗᓕᕆᔾᔪᑎᓄᑦ ᐊᑭᓕᐅᑎᐅᕙᑦᑐᑦ .5%-ᐳᓴᓂᑦ, ᐃᑲᔫᑎᑦᓴᐅᒐᔭᖅᑐᓂᑦ ᓱᓪᓗᓕᒃᑯᑦ ᐱᔨᑦᓯᕋᐅᑎᓕᕆᓂᕐᒧᑦ ᐊᑭᓕᕆᐊᓕᓐᓂᑦ.
• ᖁᕝᕙᒋᐊᖅᑕᐅᓗᑎᒃ ᐱᖁᑎᓄᑦ ᑖᒃᓰᔭᐃᔭᐅᑎᐅᕙᑦᑐᑦ 3%-ᐳᓴᓂᑦ, ᐊᐅᓚᔾᔭᒋᐊᕈᑎᑦᓴᓂᑦ ᑮᓇᐅᔭᓂᑦ ᐃᓯᖅᑐᑦᓴᓂᑦ ᓱᓇᓕᒫᓂᑦ ᐊᐅᓚᑦᑎᔾᔪᑎᐅᕙᑦᑐᓄᑦ, ᐃᑲᔪᕐᓱᐃᔾᔪᑎᐅᒐᔭᖅᑐᓂᑦ ᖁᕝᕙᒋᐊᕋᔭᖅᑐᓄᑦ ᑮᓇᐅᔭᐃᔭᖅᑕᐅᒋᐊᖃᕐᓂᐊᖅᑐᓂᑦ ᖁᕝᕙᒋᐊᕈᑎᓂᑦ ᑮᓇᐅᔭᐃᔭᐅᑎᓂᑦ ᐱᔨᑦᓯᕋᐅᑎᓄᑦ.
ᑮᓇᐅᔭᒃᑯᑦ ᐊᑐᖅᑐᑦᓴᓕᐊᖑᓯᒪᔪᑦ ᐱᒋᐊᕐᓯᒪᑎᑕᐅᓂᐊᖅᑐᑦ ᔮᓐᓄᐊᕆ 1, 2022.
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ ᐃᖅᑲᓇᐃᔭᕐᓇᐅᑎᓪᓗᒍ:
ᐊᓕᒃᓯ ᑳᒧᕋᓐ
ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᓂᕐᒥᑦ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5607 | a.cameron@iqaluit.ca
