ᖃᓄᖅ ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᐊᒻᒪ ᐃᖅᑲᓇᐃᔭᖅᑎᖏᑦ ᐱᓕᕆᖃᑎᒌᑉᐸᑉᐸ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ

ᖃᓄᖅ ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᐊᒻᒪ ᐃᖅᑲᓇᐃᔭᖅᑎᖏᑦ ᐱᓕᕆᖃᑎᒌᑉᐸᑉᐸ

ᔪᓚᐃ 29, 2025 − ᐃᖃᓗᐃᑦ, ᓄᓇᕗᑦ

 

ᓄᓇᓕᐸᐅᔭᒃᑯᑦ ᐃᖃᓗᓐᓂ ᓄᓇᓕᒻᒥᐅᓂᒃ ᑐᑭᓯᒋᐊᖅᑎᑦᑎᒍᒪᔪᑦ ᖃᓄᖅ ᓄᓇᓖᑦ ᒐᕙᒪᓕᕆᓲᓐᖑᒻᒪᖔᑕ, ᐊᒻᒪ ᑭᓇ ᑲᒪᒋᔭᖃᕆᐊᖃᖅᐸᒻᒪᖔᖅ ᓱᓇᒥᒃ ᓄᓇᓕᐸᐅᔭᒃᑯᑦ ᐊᓪᓚᕝᕕᖓᓂ. ᓄᓇᓕᐸᐅᔭᒃᑯᑦ ᒪᓕᑉᐸᑦᑐᑦ ᑲᑎᒪᔨᓄᑦ−ᐊᖏᔪᖅᑳᓄᑦ ᐊᐅᓚᑦᑎᔾᔪᑎᒥᒃ. ᐅᓇ ᑐᑭᖃᖅᑐᖅ ᓄᓇᓕᐸᐅᔭᒃᑯᑦ ᑲᑎᒪᔨᖏᑦ, ᒪᐃᔭᖃᖅᑐᑎᒃ ᐊᒻᒪ 8−ᓂᒃ ᑲᑎᒪᔨᖃᖅᑐᑎᒃ, ᐃᓱᒪᓕᐅᕆᔪᒻᒪᕆᐅᕙᑦᑐᑦ ᐊᒻᒪ ᐋᖅᑭᔅᓱᕙᑦᑐᑎᒃ ᐊᑐᐊᒐᕐᓂᒃ ᓄᓇᓕᐸᐅᔭᒧᑦ. ᐊᒻᒪᐃᓛᒃ, Hᐊᒻᒪᓚᒃᑯᑦ ᐊᓪᓚᕕᒻᒥᐅᑕᖏᑦ, ᑐᑭᒧᐊᖅᑎᑕᐅᓪᓗᑎᑦ ᐊᓪᓚᕝᕕᓕᕆᔨᒻᒪᕆᒻᒧᑦ (CAO), ᖃᐅᔨᒪᒋᐊᕐᐸᑦᑐᖅ ᐃᓱᒪᓕᐅᕈᑕᐅᓯᒪᔪᑦ ᐊᑐᓕᖅᑎᑕᐅᒐᓗᐊᕐᒪᖔᑕ ᐊᒻᒪ ᓄᓇᓕᐸᐅᔭᐅᓪᓗ ᐱᔨᖅᑎᕋᐅᑎᖏᑦ ᑲᔪᓯᓂᖃᑦᑎᐊᕋᓗᐊᕐᒪᖔᑕ.

ᑲᑎᒪᔩᑦ ᓂᕈᐊᖅᑕᐅᕙᑦᑐᑦ ᓄᓇᓕᒻᒥᐅᓄᑦ ᐊᒻᒪ ᑲᒪᒋᔭᖃᖅᐸᑦᑐᑎᒃ ᑲᔪᓯᑎᑕᐅᓂᖏᑕ ᒪᓕᒐᕋᓛᑦ, ᑮᓇᐅᔭᑦ ᐊᑐᕐᑐᔅᓴᑦ ᐊᖏᖅᑕᐅᕙᑦᑐᑎᒃ, ᐊᒻᒪ ᐋᖅᑭᔅᓱᐃᕙᑦᑐᑎᒃ ᐊᑯᓂᐅᔪᒧᑦ ᓯᕗᓪᓕᖅᐸᐅᖁᔭᓂᒃ. ᑲᑎᒪᔩᑦ ᑭᒡᒐᖅᑐᐃᔪᑦ ᓄᓇᓕᐸᐅᔭᓕᒫᒥᒃ ᐊᒻᒪ ᓂᕆᐅᒋᔭᐅᓪᓗᑎᓗ ᓱᓕᔭᕆᐊᖃᕐᓂᕐᒥᒃ ᐊᒻᒪ ᓯᕗᓕᖅᑎᐅᓂᕐᒥᒃ. ᑲᑎᒪᔩᑦ ᑲᒪᒋᔭᖃᑦᑎᐊᖃᑦᑕᕐᒥᔪᑦ ᑲᑎᒪᔨᕌᓚᖑᓂᒃᑯᑦ ᓲᕐᓗ ᑮᓇᐅᔭᓕᕆᓂᕐᒥᒃ, ᐸᓐᓇᐃᓂᖅ ᐊᒻᒪ ᐱᕙᓪᓕᐊᑎᑦᑎᓂᖅ, ᐊᒻᒪ ᒐᕙᒪᓕᕆᓂᕐᒥᒃ ᐸᕐᓇᐅᑎᓕᕆᓂᖅ ᐊᒻᒪᓗ ᓄᓇᓕᕆᓂᖅᓯᕗᓪᓕᖅᐸᐅᖁᔭᕐᓂᓪᓗ. ᐅᑯᐊ ᑲᑎᒪᔨᕋᓛᑦ ᐃᑲᔪᖅᐸᑦᑐᑦ ᑲᑎᒪᔨᓂᒃ ᕿᒥᕐᕈᔭᐅᓂᖏᑕ ᐱᔾᔪᑕᐅᓗᐊᖃᑦᑕᕐᑐᑦ ᐊᒻᒪ ᓇᓗᓇᐃᖅᓯᕙᑦᑐᑎᒃ ᐊᓪᓚᕕᓕᕆᔩᑦ ᒪᓕᑦᑕᐅᑦᑎᐊᕋᓗᐊᕐᒪᖔᑕ ᑲᑎᒪᔨᓄᑦ ᐋᖅᑭᑦᑕᐅᖁᔭᕐᓂᒃ.

ᐊᓪᓚᕕᒻᒥᐅᑕᑦ ᐃᖅᑲᓇᐃᔭᖅᑎᖏᑦ 150−ᒦᕈᔪᑦᑐᑦ. ᖃᐅᑕᒫᖅᓯᐅᑎᓂᒃ ᐱᔨᖅᑎᕋᑉᐸᑦᑐᑦ ᓲᕐᓗ ᐃᒥᖅᑕᕈᑎᓂᒃ, ᐊᑦᑕᐅᑎᓂᒃ ᓄᐊᑦᑎᓂᕐᒥᒃ, ᒪᓕᒐᕋᓛᓂᒃ ᐊᑐᓕᖅᑎᑦᑎᓂᕐᒥᒃ, ᐱᓐᖑᐊᖅᑐᓕᕆᓂᕐᒥᒃ, ᐊᒻᒪ ᑐᐊᕕᕐᓇᖅᑐᓕᕆᓂᕐᒧᑦ ᐱᔨᖅᑎᕋᕐᓂᕐᒥᒃ. ᐃᖅᑲᓇᐃᔭᖅᑎᓕᒫᑦᑎᐊᑦ ᐊᖏᔪᖅᑳᖃᕐᑐᑦ ᐊᓪᓚᕝᕕᓕᕆᔨᒻᒪᕆᒻᒥ, ᐃᖅᑲᓇᐃᔭᖅᑎᑐᐊᑦᑎᐊᖅ ᑲᑎᒪᔨᓄᑦ ᐃᖅᑲᓇᐃᔭᖅᑎᑖᕆᔭᐅᕙᑦᑐᖅ. ᐊᓪᓚᕝᕕᓕᕆᔨᒻᒪᕆᒃ ᑲᑎᑎᑦᑎᖃᑦᑕᖅᑐᖅ ᐃᓱᒪᓕᐅᕈᑕᐅᔪᓂᒃ ᑲᑎᒪᔨᓄᑦ ᐱᓕᕆᐊᖑᕙᑦᑐᓂᒃ ᓄᓇᓕᐸᐅᔭᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐊᒻᒪ ᐅᖃᐅᔾᔨᒋᐊᕐᐸᑦᑐᑎᒃ ᑐᑭᓯᒋᐊᕈᑎᒃᓴᓂᑦ ᐃᑲᔪᖅᑐᐃᔾᔪᑎᒃᓴᐅᓂᐊᕐᓗᑎᑦ ᑲᑎᒪᔨᓄᑦ ᐃᓱᒪᓕᐅᕆᔾᔪᑎᒃᑎᐊᕙᓐᓂᒃ.

ᐊᓪᓚᕝᕕᓕᕆᔨᒻᒪᕆᒃ ᐱᓕᕆᐊᖃᕆᐊᖃᖅᑐᖅ ᓄᓇᓕᐸᐅᔭᒃᑯᑦ ᐱᓕᕆᐊᖏᑦ ᐊᐅᓚᑕᐅᑦᑎᐊᕋᓗᐊᕐᒪᖔᑕ. ᐊᐅᓚᑦᑎᕙᑦᑐᑦ ᓄᓇᓕᐸᐅᔭᒃᑯᑦ ᐃᖅᑲᓇᐃᔭᖅᑎᖏᓐᓂ, ᑲᒪᒋᔭᖃᖅᑐᑎᒃ ᑮᓇᐅᔭᖅᑐᕈᑎᒃᓴᓂᑦ ᐊᒻᒪ ᐊᖏᔪᓂᒃ ᐱᓕᕆᐊᒃᓴᓂᑦ, ᐊᒻᒪᓗ ᐋᖅᑭᔅᓱᐃᔨᒻᒪᕆᒋᔭᐅᔪᑦ ᑲᑎᒪᔨᓄᑦ ᐊᓪᓚᕝᕕᓕᕆᔨᓄᓪᓗ. ᑕᒪᒃᑯᐊ ᐃᓱᒪᓕᐅᕈᑕᐅᔪᑦ ᑲᑎᒪᔨᓄᑦ ᑲᑎᒪᓂᕐᒥᒃ ᓴᖅᑮᑎᑦᑎᔾᔪᑕᐅᔪᒪᔪᑦ ᑕᖏᓕᓐᓂᒃ ᓄᓇᓕᒻᒥᐅᓄᑦ. ᐊᓪᓚᕝᕕᓕᕆᔨᒻᒪᕆᒃ ᓇᓗᙱᑦᑎᐊᕋᓱᒃᐸᑦᑐᖅ ᑖᒃᑯᐊ ᑲᑎᒪᔩᑦ ᐱᑎᑕᐅᖃᑦᑕᖁᓪᓗᒋᑦ ᐱᓕᕆᔨᒻᒪᕆᐅᔪᓄᑦ ᖃᐅᔨᓴᕈᑎᓂᒃ, ᐱᓕᕆᐊᖑᓯᒪᔪᓂᒃ, ᐊᒻᒪ ᐅᖃᐅᔾᔪᐃᕙᓐᓂᒥᓪᓗ ᓴᓐᖏᔪᒥᒃ, ᖃᐅᔨᔾᔪᑕᐅᓯᒪᔪᓂᒃ−ᑐᙵᕕᓕᓐᓂᒃ ᐃᓱᒪᓕᐅᕈᑕᐅᔪᓂᒃ.

ᖃᐅᔨᒪᔭᐅᔭᕆᐊᖃᓪᓚᕆᑦᑐᖅ ᐊᑐᓂ ᑲᑎᒪᔨᐅᔪᑦ ᐅᖃᐅᔾᔨᒋᐊᖃᑦᑕᖏᒻᒪᑕ ᐃᖅᑲᓇᐃᔭᖅᑎᓂᒃ. ᑐᓴᐅᒪᖃᑎᒌᓐᓂᓕᒫᑦ ᑲᑎᒪᔨᓄᑦ ᐊᒻᒪ ᐃᖅᑲᓇᐃᔭᖅᑎᓄᓪᓗ ᐊᓪᓚᕝᕕᓕᕆᔨᒻᒪᕆᒃᑰᕆᐊᖃᖅᑐᑦ. ᐅᓇ ᐱᓕᕆᔾᔪᓯ ᓴᐳᔾᔨᔾᔪᑕᐅᔪᖅ ᐱᓕᕆᔨᒻᒪᕆᐅᔪᓂᒃ ᐊᒻᒪ ᒐᕙᒪᓕᕆᓂᒃᑰᖏᑦᑐᒃᑯᑦ ᐱᔨᖅᑎᕋᖃᑦᑕᕐᓂᕐᒥᒃ ᐃᓄᓐᓄᑦ, ᐊᐅᓚᑕᐅᔪᑦ ᑐᓐᖓᕕᖃᕐᒪᑕ ᐊᔪᓐᖏᓂᖃᓪᓚᕆᑦᑐᒥᒃ, ᒐᕙᒪᓕᕆᓂᒃᑰᙱᑦᑐᖅ. ᐃᑲᔪᖅᑐᐃᕙᒻᒥᔪᖅ ᐃᑉᐱᒍᓯᖃᑎᒌᑦᑎᐊᕐᓂᕐᒥ ᐊᒻᒪ ᐱᓕᕆᖃᑎᒌᑦᑎᐊᓂᕐᒥᒃ ᐃᖅᑲᓇᐃᔭᖃᑎᒌᑦᑐᓄᑦ ᐃᖅᑲᓇᐃᔭᕐᕕᒻᒥ.

ᑲᑎᒪᔨᓄᑦ ᐊᖏᖅᑕᐅᓯᒪᓕᑐᐊᕐᐸᑦ ᐱᖁᔨᕗᖔᕈᑎ ᐅᕝᕙᓘᓐᓃᑦ ᒪᓕᒐᕋᓛᖅ, ᐊᓪᓚᕝᕕᓕᕆᔨᒻᒪᕆᒃ ᑎᓕᓯᓕᖅᑐᓂ ᐊᓪᓚᕕᒥᒃ ᐱᓕᕆᐊᖃᕆᐊᖃᖅᑐᒧᑦ. ᓲᕐᓗ ᐃᒪᓐᓇ, ᐱᕙᓪᓕᐊᑎᑦᑎᓂᕐᒧᑦ ᐱᔪᓐᓇᐅᑎ ᐊᖏᖅᑕᐅᑉᐸ, ᐸᓐᓇᐃᓂᕐᒧᑦ ᐊᒻᒪ ᐱᕙᓪᓕᐊᑎᑦᑎᔩᑦ ᒪᓕᖃᑦᑕᕐᑐᑦ ᐊᑐᖅᑕᐅᔭᕆᐊᓕᓐᓂᒃ ᓴᓇᔭᐅᓂᖓᓄᑦ ᐱᔪᓐᓇᐅᑎ. ᑲᑎᒪᔩᑦ ᐊᖏᖅᐸᑕ ᑮᓇᐅᔭᖅᑐᕈᑎᒃᓴᓂᑦ ᐃᒪᕐᒧᑦ ᐱᓕᕆᐊᒥᒃ, ᐊᐅᓚᐅᓯᕆᔨᒃᑯᑦ ᓯᕗᒃᑲᑕᕐᓂᐊᕐᑐᑦ ᑕᒪᑐᒥᖓ. ᑕᒪᓐᓇ ᐋᖅᑭᑦᑕᐅᓯᒪᔪᖅ ᖃᐅᔨᒪᔾᔪᑕᐅᔪᖅ ᑲᑎᒪᔨᓄᑦ ᐃᓱᒪᕐᓴᕐᓯᐅᕈᑕᐅᔪᑦ ᐸᓐᓇᐃᑎᓪᓗᒋᑦ ᐊᑐᓕᖅᑎᑕᐅᓗᓂ ᑐᑭᓯᓇᖅᑐᒃᑯᑦ ᐊᒻᒪ ᓵᑕᒃᓴᐅᓗᑎᓗ ᐱᓕᕆᔾᔪᓯᒥᒃ.

ᐅᓇ ᐱᓕᕆᔾᔪᓯ ᐃᑲᔪᖅᑐᐃᔪᖅ ᓄᓇᓕᒻᒥᐅᓕᒫᓂᒃ ᐱᔨᖅᑎᕋᕈᑕᐅᔭᕆᐊᓕᓐᓂᒃ ᐊᒻᒪ ᐊᑐᐃᓐᓇᐅᑎᐊᖅᑐᒥᒃ ᐱᔨᑦᑎᕋᐅᑎᓂᒃ – ᐱᓗᐊᖅᑐᒥᒃ ᐅᑭᐅᖅᑕᖅᑐᒥ ᐅᕙᒍᑦ ᓄᓇᓕᐸᐅᔭᖓᑎᑐᑦ, ᐃᒥᖅᑕᖅᑎᑦᑎᖃᑦᑕᕐᓂᖅ, ᑲᒪᒋᔭᖃᕐᓂᖅ ᒪᑭᒪᔾᔪᑎᒃᓴᓂᑦ, ᐊᒻᒪ ᑐᐊᕕᕐᓇᖅᑐᓕᕆᔾᔪᑎᓂᒃ ᐊᔾᔨᐅᖏᑦᑐᒥᒃ ᐱᒡᒐᓇᕈᑕᐅᕙᑦᑐᑦ ᒫᓐᓇ. ᓄᓇᓕᐸᐅᔭᒃᑯᑦ ᑲᔪᓰᓐᓇᖃᑦᑕᕐᑐᑦ ᓯᓚ ᖃᓄᐃᑦᑑᓂᓕᒫᖓᓂ, ᐃᓪᓗᓕᐅᕐᐸᑦᑐᑎᒃ ᐊᕐᕌᒍ ᐃᓚᐃᓐᓇᖓᓂ, ᐊᒻᒪ ᐊᑭᑐᔪᒻᒪᕆᐊᓗᓐᓂᒃ ᐃᖏᕐᕋᔾᔪᑎᓂᒃ, ᐸᓐᓇᐅᑎᓕᐅᕐᑎᐊᖃᑦᑕᕐᑐᑦ ᐊᒻᒪ ᐱᓕᕆᔭᖃᑦᑎᐊᑐᒻᒪᕆᐅᕙᑦᑐᑦ ᐱᒻᒪᕆᐅᓂᕐᓴᐅᔪᓂᒃ.

ᒐᕙᒪᓕᕆᓂᓐᒨᖓᖏᑐᒃᑯᑦ ᓯᕗᒃᑲᑕᖅᑕᐅᕙᓐᓂᖏᑦ ᖃᐅᑕᒫᖅ ᐊᐅᓚᑕᐅᔪᑦ, ᓄᓇᓕᐸᐅᔭᒃᑯᑦ ᐱᓕᕆᔨᒻᒪᕆᖏᑦ ᐱᓕᕆᐊᖃᖃᑦᑕᕐᑐᑦ ᐱᔭᕆᐊᑐᔪᓂᒃ ᐱᔨᖅᑎᕋᕈᑎᓂᒃ, ᓂᕈᐊᖅᑕᐅᓯᒪᔪᑦ ᑲᑎᒪᔩᑦ ᑐᕌᒐᖃᓗᐊᕐᐸᑦᑐᑦ ᓄᓇᓕᒻᒥᐅᓄᑦ ᓂᓪᓕᐊᒍᑕᐅᔪᓂᒃ ᐊᒻᒪ ᐋᖅᑭᔅᓱᐃᓪᓗᑎᑦ ᐊᑕᖐᔪᒥᒃ ᖃᓄᐃᓕᐅᖁᔨᓂᕐᒥᒃ. ᐅᓇ ᐱᓕᕆᔾᔪᓯ ᐱᕕᖃᖅᑎᑦᑎᔪᖅ ᑲᑎᒪᔨᓂᒃ ᑭᒡᒐᖅᑐᐃᑦᑎᐊᕐᓂᕐᒥᒃ ᓄᓇᓕᒻᒥᐅᓂᒃ ᐊᒻᒪ ᐃᖅᑲᓇᐃᔭᖅᑎᓂᒃ ᐱᕕᖃᖅᑎᑦᑎᐊᕐᑐᑎᒃ ᐋᖅᑭᐅᒪᑦᑎᐊᑐᒃᑯᑦ ᐃᖅᑲᓇᐃᔭᖅᑎᑦᑎᓂᕐᒥᒃ.

 

###

 

ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:

 

ᔩᐅᑉ ᕙᕐᓂ

ᐊᖏᔪᖅᑳᖅ ᑐᓴᐅᒪᔪᓕᕆᔨᒃᑯᓐᓄᑦ ᐊᒻᒪ ᐊᑭᓕᕐᓱᐃᔨᓄᑦ ᐱᔨᖅᑎᕋᐅᑎ

ᓄᓇᓕᐸᐅᔭᐃᑦ ᐃᖃᓗᐃᑦ

867-979-5619 | G.Byrne@iqaluit.ca