ᐊᑐᖅᑕᐅᓯᒪᔪᑦ

ᐃᖃᓗᐃᑦ, ᐃᓄᑦᑎᑐᑦ ᑐᑭᖓ “ᐃᖃᓗᓕᐅᓗᒃ,” ᓴᓂᐊᓃᑦᑐᖅ ᐃᓱᐊᑕ ᑰᑉ ᑕᓯᐅᔭᕐᔪᐊᒧᑦ ᐊᓂᐊᔫᑉ ᐊᑦᑎᖅᑕᐅᓯᒪᔫᑉ ᐃᓱᒪᒋᔭᐅᓗᓂ ᒫᕐᑎᓐ ᕗᕉᐳᓱᕐ, ᑕᕆᐅᑉ ᐊᑭᐊᓂᒥᐅᑕᒥᓂᖅ ᕿᓂᖅᑎᐅᓚᐅᖅᑑᑉ ᑕᓪᓗᕈᑎᒥᑦ.  ᓇᓂᓱᕆᓚᐅᖅᑕᖓ ᑕᓪᓗᕈᑎ ᐊᒻᒪᓗ ᓇᓂᓯᓯᓱᕆᓚᐅᕐᒥᔪᖅ ᒎᓗᒥᑦ ᕿᑭᖅᑕᒥ ᑕᓯᐅᔭᕐᔪᐊᒦᑦᑐᒥ, ᑭᓯᐊᓂ ᒎᓘᓚᐅᖏᑦᑐᖅ ᐅᔭᕋᑐᐃᓐᓇᐅᓚᐅᖅᑐᖅ ᐊᖏᕐᕋᐅᔾᔭᖓ ᐃᖕᓚᓐᒧᑦ.  ᐊᑯᓐᓂᖏᓐᓂ ᐊᕐᕌᒍᐃᑦ 1955 ᐊᒻᒪᓗ 1987 ᓄᓇᓕᖓ ᐃᖃᓗᐃᑦ ᖃᐅᔨᒪᔭᐅᓚᐅᖅᑐᖅ ᕗᕉᐳᓱ ᐸᐃᒥᑦ.

ᐊᑐᖅᑕᐅᓯᒪᓕᖅᑐᑦ ᐃᖃᓗᓐᓂ

1576 - ᓲᕐ ᒫᕐᑎᓐ ᕗᕉᐳᓱᕐ ᐹᖑᓅᖅᑐᒥᓂᖅ ᑕᓯᐅᔭᕐᔪᐊᑉ, ᐃᑭᕋᓴᐅᓱᕆᓪᓗᓂᐅᒃ ᐊᒻᒪᓗ ᓴᐃᓇᒧᑦ ᐊᖅᑯᑎᓯᐊᕐᓱᕆᓪᓗᓂ ᐱᔪᒥᓂᖅ.

1861 – ᓵᕐᓪᔅ ᕗᕌᓐᓯᔅ ᕼᐋᓪ ᑎᑭᓚᐅᖅᑐᖅ ᕗᕉᐳᓲᑉ “ᐃᑭᕋᓴᖏᓐᓄᑦ,” ᐅᖃᐅᔾᔭᐅᓚᐅᖅᑐᓂ ᐊᖑᓇᓱᑦᑎᒧᑦ ᐊᑎᓕᒻᒧᑦ ᑰᔭᔅᓯ ᑲᖏᕐᓲᓂᖓᓂᑦ ᐊᒻᒪᓗ ᐅᖃᐅᓯᐅᓯᒪᔪᒻᒪᕆᒃ ᑕᓪᓗᕈᑎᐅᒐᓂ.  ᑕᐃᑦᓱᒪᓂ, ᕼᐋᓪ ᑕᒻᒫᓚᐅᕐᓯᒪᓕᖅᑐᒥᓂᖅ ᓯᓈᖓᓂ ᑰᑉ ᑲᖏᖅᑑᑉ ᐹᖓᓂ.  ᑰᒃ ᐊᑦᑎᓚᐅᖅᑕᖓ ᓯᐅᓪᕕᐊ ᒍᕆᓂᐅᓪᒥᑦ ᐊᒻᒪᓗ ᑲᖏᖅᑐᖅ ᑰᔭᔅᓯᒥᑦ, ᐊᖅᑯᑎᒥᑦ ᖃᐅᔨᒪᔨᑕᕆᓚᐅᖅᑕᖓ ᐊᒻᒪᓗ ᓄᓇᓕᕆᔨᒋᓚᐅᖅᑕᖓ.

1880 – ᐳᕆᑎᔅ ᒐᕙᒪᒃᑯᖏᑦ ᓴᖑᑎᑦᓯᓚᐅᖅᑐᑦ ᐊᐅᓚᑦᓯᔾᔪᑎᒥᓂᒃ ᐅᑭᐅᖅᑕᖅᑐᒥᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ.

1900 ᐊᕐᕌᒍᐃᑦ ᐱᒋᐊᕋᑖᖏᓐᓂ - ᐊᕐᕕᕋᓱᓗᐊᓚᐅᕈᓐᓃᖅᑐᑦ, ᕿᓯᓐᓂᒃ ᐊᒥᕐᓂᓪᓗ ᐱᔪᒪᓂᕐᓴᐅᓕᖅᑐᑎᒃ.  ᐃᕐᓯᕋᔾᔪᐊᒃᑯᑦ ᐊᒻᒪᓗ ᐋᖕᓕᑲᓐᑯᑦ ᑐᑦᓯᐊᕐᕕᓕᕆᔨᑦ ᓴᖏᓂᖅᑖᓚᐅᖅᑐᑦ ᐅᑭᐅᖅᑕᖅᑐᒥ ᐊᔪᕆᕐᓱᐃᔨᖏᑎᒍᑦ.

1914 - ᕼᐊᑦᓴᓐ ᐸᐃᒃᑯᑦ ᒪᑐᐃᕐᓯᓚᐅᖅᑐᑦ ᓂᐅᕕᕐᕕᒻᒥᑦ ᑕᐅᕐᓰᕕᒻᒥᑦ ᕿᓯᓐᓂᑦ ᐊᒥᕐᓂᑦ ᓂᕿᓄᑦ ᑮᓇᐅᔭᓄᓪᓗ ᐃᖃᓗᒑᕐᔪᓐᓂ, 40 ᒪᐃᓕᓂᑦ ᐅᖓᓯᓐᓂᓕᒃ ᐃᖃᓗᓐᓂᐅᓕᖅᑐᖅ.

1920-ᖏᓐᓂ ᐊᕐᕌᒍᓂ - ᕼᐊᑦᓴᓐ ᐸᐃᒃᑯᑦ ᕿᑭᖅᑖᓗᒻᒥ ᓇᒥᑐᐃᓐᓇᖅ ᒪᑐᐃᕐᓯᓚᐅᖅᑐᑦ ᓂᐅᕕᕐᕕᓐᓂᑦ.  ᐸᓖᓯᒃᑯᑦ ᐱᓕᕆᕝᕕᑖᓚᐅᕐᓂᖏᑦ ᑲᓇᓐᓇᖓᓂ ᐊᒻᒪᓗ ᐅᑭᐅᖅᑕᖅᑑᑉ ᖁᑦᓯᓐᓂᖏᓐᓂ ᐋᖅᑭᑦᓱᐃᔾᔪᑎᐅᓚᐅᖅᑐᑦ ᑲᓇᑕᐅᑉ ᐊᐅᓚᑦᓯᔾᔪᑎᖏᓐᓂᑦ.

1930-ᖏᓐᓂ ᐊᕐᕌᒍᓂ - ᕿᓯᓐᓄᑦ ᐊᒥᕐᓄᑦ ᐊᑭᒋᔭᐅᕙᑦᑐᑦ ᑲᑕᑦᑐᒻᒪᕆᐅᓚᐅᖅᑐᑦ; ᐊᒥᓱᐊᓗᐃᑦ ᓂᒋᕐᒦᖔᕐᓯᒪᔪᑦ ᓂᐅᕕᖅᑎᑦ ᑕᐅᕐᓰᔨᑦ ᐊᐅᓛᓕᖅᑐᒥᓃᑦ.  ᑕᐃᑦᓱᒪᓂ ᐃᓄᐃᑦ ᐱᒡᒐᑐᒻᒪᕆᐅᓕᓚᐅᕐᓯᒪᔪᑦ ᓂᕐᔪᑎᑦ ᓄᖑᑕᐅᑲᓴᑦᑐᒥᓂᐅᓂᖏᓐᓄᑦ ᐊᒻᒪᓗ ᖃᓪᓗᓈᓕᓴᑦ ᐊᒥᒐᖅᑐᒻᒪᕆᐅᕙᓕᖅᑐᑎᒃ.

1942 - ᒥᐊᓕᒐᒃᑯᑦ ᐆᓇᓕᖁᑎᖏᑦ ᓂᕈᐊᖅᑐᒥᓃᑦ ᑰᔭᔅᓯᒥᑦ ᖃᖓᑕᓲᓄᑦ ᒥᕝᕕᒻᒪᕆᐅᓕᐊᖁᓪᓗᒍ.

1943 - ᒥᐊᓕᒐᐃᑦ ᒥᕝᕕᖓᑦ ᐊᐅᓚᑕᐅᑦᓯᐊᓕᖅᑐᒥᓂᖅ ᐊᒻᒪᓗ ᕼᐊᑦᓴᓐ ᐸᐃᒃᑯᑦ ᓄᑦᑎᖅᑐᑎᒃ ᓂᐊᖁᓐᖒᑎᓄᑦ, ᐱᔾᔪᑎᖃᓗᐊᖅᑐᑎᒃ ᐊᑲᐅᓂᕐᓴᓂᑦ ᐃᖏᕐᕋᔾᔪᑎᖃᕐᓂᖏᓐᓄᑦ ᐊᒻᒪᓗ ᑐᓴᐅᒪᐅᑎᓂᑦ ᐊᑐᐃᓐᓇᐅᑎᑕᐅᔪᓂᑦ ᖃᖓᑕᓲᓕᕆᔨᓄᑦ, ᐊᒻᒪᓗ ᐊᑲᕐᕆᔮᕐᓂᕐᓴᐅᖁᓪᓗᒋᑦ ᐃᓄᐃᑦ ᑕᓯᐅᔭᕐᔪᐊᑉ ᕿᖑᐊᓃᓐᓂᕐᓴᐅᓕᖅᑐᒥᓃᑦ.

1955-57 - ᓄᑖᖅ ᓄᓇᓕᕋᓛᖓᑦ ᕗᕉᐳᓱ ᐸᐃᑉ ᑐᖕᖓᕕᐅᓕᓚᐅᖅᑐᖅ ᑑᓚᐃᓕᕆᔨᓄᑦ (ᑐᓴᐅᒪᐅᑎᓕᕆᔾᔪᑎᓂᑦ). ᐱᓕᕆᐊᕐᔪᐊᒻᒪᕆᐊᓘᓕᕐᒪᑦ ᓱᓇᒃᑯᑖᓂᑦ ᐊᒥᓱᒻᒪᕆᓐᓂᑦ ᐊᒻᒪᓗ ᐊᒥᓱᐊᓗᓐᓂᑦ ᐊᖑᑎᓂᑦ ᑕᒪᐅᖕᖔᖅᑲᐃᓕᖅᑐᑎᒃ.  1957-ᖑᓕᖅᑎᓪᓗᒍ, ᓄᓇᓕᓐᓂᒥᐅᑕᐃᑦ 1200-ᓗᐊᖑᓕᓚᐅᖅᑐᑦ, ᐃᓄᐃᑦ 489-ᖑᓪᓗᑎᒃ.

1959 - ᑲᓇᑕᐅᑉ ᒐᕙᒪᒃᑯᖏᑦ ᓗᑦᑖᓂᑦ, ᐃᓕᓴᐃᔨᓂᑦ, ᐊᓪᓚᕝᕕᓕᕆᔨᓂᑦ, ᐊᓪᓚᑦᑎᓂᑦ ᐊᒻᒪᓗ ᐃᖅᑲᓇᐃᔭᖅᑎᓂᑦ ᐃᑲᔪᖅᑎᑦᓴᓂᑦ ᐋᖅᑭᓱᖅᑕᐅᕙᓪᓕᐊᔪᒧᑦ. ᐃᓄᐃᑦ ᐊᒥᓱᕈᖅᐸᓪᓕᐊᓕᖅᑐᑎᒃ ᕗᕉᐳᓱ ᐸᐃᒥ ᐊᒻᒪᓗ ᓂᐊᖁᓐᖒᑎᓂ.

1960-63 - ᕗᕉᐳᓱ ᐸᐃ ᒥᐊᓕᒐᐃᑦ ᐅᓇᓕᖁᑎᖏᑕ ᑐᖕᖓᕕᒻᒪᕆᓕᖅᑕᒥᓂᖓ. 1963-ᖑᓕᖅᑎᓪᓗᒍ, ᒥᐊᓕᒐᐃᑦ ᐅᓇᓕᖏᑦ ᐊᐅᓪᓛᕐᒪᑕ, ᕗᕉᐳᓱ ᐸᐃ ᑲᓇᑕᐅᑉ ᒐᕙᒪᒃᑯᖏᑕ ᒐᕙᒪᓕᕆᕝᕕᑖᕆᓚᐅᖅᑕᖓ, ᑐᓴᐅᒪᐅᑎᓕᕆᕝᕕᑖᕆᓪᓗᒍ ᐊᒻᒪᓗ ᐃᖏᕐᕋᔪᓕᕆᔾᔪᑎᓂᑦ ᐱᓕᕆᕝᕕᐅᓕᖅᑐᓂ ᑲᓇᓐᓇᒥ ᐅᑭᐅᖅᑕᖅᑐᒥᐅᑕᓄᑦ.

ᔪᓂ 1964 - ᓯᕗᓪᓕᖅᐸᒥᑦ ᓄᓇᓕᒻᒥᐅᑕᐃᑦ ᑲᑎᒪᔨᑖᖅᑐᑦ.

1970 - ᕗᕉᐳᓱ ᐸᐃ ᓇᓗᓇᐃᖅᑕᐅᔪᖅ ᒪᓕᒐᑎᒍᑦ ᓄᓇᓕᕋᓛᖑᓂᖓᓂᑦ.

1974 - ᕗᕉᐳᓱ ᐸᐃ ᓇᓗᓇᐃᖅᑕᐅᔪᖅ ᒪᓕᒐᑎᒍᑦ ᕕᓕᔾᔨᐅᒋᐊᖓᓂᑦ.

1976 - ᐃᓄᐃᑦ ᑕᐱᕇᑦᓴᑦ ᑲᓇᑕᒥ (ᐊᐃᑏᓰᒃᑯᑦ) ᓴᓇᔭᐅᖁᔨᓕᖅᑐᑎᒃ ᓄᓇᕘᒥᑦ ᓇᓗᓇᐃᕐᓯᒋᐊᖓᓚᐅᖅᑐᑦ.

1979 - ᕗᕉᐳᓱ ᐸᐃᒥ ᓯᕗᓪᓕᐹᑦᓯᐊᒥᑦ ᒪᐃᔭᑖᓚᐅᖅᑐᑦ.

1980 - ᕗᕉᐳᓱ ᐸᐃ ᓇᓗᓇᐃᖅᑕᐅᔪᖅ ᒪᓕᒐᑎᒍᑦ ᑕᐅᓐᖑᓂᖓᓂᑦ.

1987 - ᕗᕉᐳᓱ ᐸᐃ ᒪᓕᒐᑎᒍᑦ ᐃᖃᓗᓐᓂᑦ ᐊᑦᑎᖅᑕᐅᓚᐅᖅᑐᖅ, ᐅᑎᖅᑎᑕᐅᓗᓂ ᑕᐃᒎᓯᕆᑦᓴᐅᑎᒋᔭᒥᓂᖓ ᐃᓄᑦᑎᒍᑦ.

ᒪᐃ 1993 - ᐊᑎᓕᐅᖅᑕᐅᓚᐅᖅᑐᖅ ᓄᓇᕗᑦᒥᑦ ᓄᓇᑖᕈᑕᐅᓚᐅᖅᑐᖅ ᐊᖏᕈᑎ ᐃᖃᓗᓐᓂ.

ᑏᓰᐱᕆ 1995 - ᐃᖃᓗᐃᑦ ᓂᕈᐊᖅᑕᖅ ᐊᖏᔪᖅᑳᖃᕐᕕᐅᓛᕐᓂᖓᓂᑦ ᓄᓇᕘᒥ.

ᐃᐳᕈ 1, 1999 - ᓄᑖᖅ ᓄᓇᕘᖑᓕᖅᑐᖅ ᒪᓕᒐᑎᒍᑦ ᓴᖅᑭᖅᑐᖅ. ᑲᓇᑕᒥ ᐊᒻᒪᓗ ᓄᓇᕐᔪᐊᕐᒥᐅᑕᐃᑦ ᒐᕙᒪᓕᕆᔨᑦ, ᐱᕙᓪᓕᐊᔪᓕᕆᔨᑦ ᑐᓴᕋᑦᓴᓂᑦ ᐊᒻᒪᓗ ᓂᐅᕐᕈᔪᑦ ᐃᖃᓗᓐᓅᓕᓚᐅᕐᓯᒪᔪᑦ ᓇᓪᓕᐅᓂᕐᓯᐅᖃᑕᐅᒋᐊᖅᑐᖅᑐᑎᒃ.

ᐃᐳᕈ 19, 2001 - ᐃᖃᓗᐃᑦ ᒪᓕᒐᑎᒍᑦ ᓇᓗᓇᐃᒃᑯᑎᒻᒪᕆᒻᒥᑦ ᐱᑎᑕᐅᔪᑦ ᓄᓇᓕᐸᐅᔭᐅᓂᐊᓕᕐᓂᖏᓐᓂᑦ.

ᒫᕐᓯ 2002 - ᐃᖃᓗᓐᓂ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᖕᖑᐊᕕᔾᔪᐊᕐᕕᐅᓚᐅᖅᑐᑦ ᑲᑐᔾᔨᖃᑎᖃᖅᑐᑎᒃ ᓅᒃᒥᑦ, ᑲᖥᖡ ᓄᓈᓂᒥᐅᑕᐃᑦ.

ᐋᑦᑑᐸ 11, 2002 - ᐃᖃᓗᓐᓄᑦ ᓂᐅᕐᕈᓚᐅᖅᑐᖅ ᑯᐃᓐ ᐃᓕᓴᐸᑦ ᑐᓪᓕᖅ.

2007 - ᐅᐊᐃᑦ ᓯᑐᓚᐃᑉᔅ (ᓂᔾᔭᐅᓯᔭᖅᑎᑦ) ᐃᖃᓗᓐᓂ ᓂᔾᔭᐅᓯᔭᖅᑐᓂᑦ ᐊᔾᔨᓕᐅᕆᓚᐅᖅᑐᑦ ᐊᒻᒪᓗ ᓂᔾᔭᐅᓯᔭᖅᑐᑎᒃ ᐱᐅᑦᓴᖅᑐᓄᑦ.

ᕕᕝᕗᐊᕆ 5, 2010 – G7 ᑮᓇᐅᔭᓕᕆᓂᕐᒧᑦ ᒥᓂᔅᑕᐃᑦ ᓇᑭᑐᐃᓐᓈᕐᓯᒪᔪᑦ ᐃᖃᓗᓐᓂ ᑲᑎᒪᓚᐅᖅᑐᑦ.